صباح الخير يا جماعه ان كان صباحكم ومساء الخير ان كان مساءكم
انا طبعا مقدرش اشوف موضوع هايل زى ده ومردش فيه ومشكرش صحبته كمان
بعد الشكر على الموضوع والذى منه
احب اقول رايى المتواضع فى الموضوع الجميل ده
اولا لازم كلنا نعرف ان الجواز نصيب وبمعاد زى الموت بالظبط
ثانيا احب اقول لساره ان مفيش حاجه اسمها بلا جواز بلا نيلة كل بنت وكل ولد نفسه يتجوز
ان مكانش عشان الحب فهو علشان يحمى نفسه من الرذيله وطبعا كلكم فاهمين
ثالثا وهو الاهم دلوقتى قليل اوى انك تلاقى اهل العروسه بيتشرطوا يعنى مجرد انه عنده شقه
يبقى خير وبركه وبيوافقوا على طول وبيدوا مهله للعرسان سنتين او حاجه عشان اللى مش جاهز
يجهز نفسه وبعدين كلكم عاملين ان الجواز مشكله وهو مش مشكله خالص انا شايفاه انه سهل
مش صعب للدرجه لان ابو العريس بيساعده جامد فى الشقه وفى معظم الحاجات
اما عن كلامك يا ساره ان البنات تقول لأ متجوزش فى بيت عيله احب اقول ان ده من حقها
لان معظم الجوازات اللى بتبقى فى بيت عيله بتبقى عيشه نكد وانا بقول معظمها عشان محدش يتكلم
نيجى لأزمة الاسكان لو بصيتى هتلاقى عندك مدن كتير فاضيه زى 6 اكتوبر والعبور والشروق
ومساكن للشباب ياما وللعلم بقى معظمهم رخيص بس احنا نبص على الشباب دلوقتى معظمهم
معاهد خاصة ومعندهمش اى خبره فى اى حاجه وكله بيقول المجتمع والناس ومصر وعايز اهاجر
كلام كله فاضى لكن انا بشوف شباب ما شاء الله عليهم بيذاكروا ويدخلوا كليات كويسه ويوفروا
مصاريف المعاهد الخاصه اللى اقلها 20 الف جنيه فى الاربع سنين كتب ومواصلات وايه وايه
وبعدين يشتغل بضمير واحده واحده ربنا بيفتحها عليه ويتجوز و يخلف وكل حاجه بس لو كل
واحد ينظم حياته ويتعب شويه مش كل حاجه عايزها من اهله
انا حاسه انى طولت عشان كده مش هكمل بس الموضوع لذيذ واللى شايف حاجه فى كلامى
غلط يا ريت يناقشنى
تحياتى للجميع